Servetschs eHealth dad eSANITA
Process da communicaziun digitals per profis en il sectur da sanadad
Servetschs eHealth dad eSANITA
Process da communicaziun digitals per profis en il sectur da sanadad
Communicaziun interdisciplinara pli effizienta, transparenza e segirezza en il sectur da sanadad
Cun ils Servetschs eHealth dad eSANITA stattan a disposiziun las dretgas datas da sanadad il dretg mument – a moda fidabla, segira ed actuala.
Servetschs eHealth dad eSANITA: soluziuns B2B e B2C cumprovadas
La plattafurma B2B eHealth eSANITA porscha process da communicaziun automatisads tranter las persunas spezialisadas dal sectur da sanadad – ils Servetschs eHealth eSANITA – sco era tranter las persunas spezialisadas e la populaziun – il dossier electronic persunal dal pazient DEP eSANITA.
Dapi l’entschatta dal 2020 è la plattafurma B2B eHealth eSANITA disponibla sco center da datas digital per il barat electronic tranter ils furniturs da prestaziuns medicinalas. Ella administrescha las adressas da las persunas spezialisadas dal sectur da sanadad e da las instituziuns da sanadad e pussibilitescha il barat da datas segir tranter ils participants – er ordaifer l’uniun. Il barat electronic è, tut tenor basegn, er integrà cumplessivamain cun interfatschas standardisadas en ils sistems dad IT da las organisaziuns da sanadad participadas.
La plattafurma B2B eHealth eSANITA persequitescha l’uschenumnada “via duala”. Questa è particulara ed unica en Svizra: grazia a la communicaziun ed ils process B2B tranter las persunas spezialisadas dal sectur da sanadad e las instituziuns da sanadad po ella metter a disposiziun ils documents relevants per il tractament – a medem temp e senza lavur supplementara manuala – en il dossier electronic persunal dal pazient (DEP) da las burgaisas e dals burgais.
“Via duala” – avantatgs era per commembers pli pitschens da l’Uniun eSANITA
Da la “via duala” profiteschan surtut era participants pli pitschens u ambulants da l’Uniun eSANITA, sco chasas d’attempads e chasas da tgira, terapeuts, apotecas, medis da chasa e spezialists:
A las persunas spezialisadas dal sectur da sanadad senza agen sistem d’infurmaziun medicinal porscha la plattafurma B2B eHealth eSANITA in agen deposit B2B per il barat da documents e maletgs – ch’èn relevants per il tractament da lur pazientas e pazients – cun autras persunas spezialisadas dal sectur da sanadad. Ultra da quai permetta la plattafurma – cuntrari als blers sistems dad IT clinics da furniturs da prestaziuns pli pitschens – dad actualisar il dossier electronic persunal dal pazient (DEP) da tut temp e confurm a la lescha.
“Via duala” – avantatgs per tut ils commembers da l’Uniun eSANITA
Da quella profiteschan surtut er ils commembers da l’Uniun eSANITA:
Als commembers da l’uniun stattan a disposiziun pliras pussaivladads tecnicas da sa colliar cun ils agens sistems dad IT da la clinica u da la pratica a la plattafurma B2B eHealth eSANITA. Quellas tanschan dal simpel portal da webaccess senza integraziun fin a soluziuns cumplessivas che permettan d’integrar process ed interfatschas en ils sistems interns dals commembers.
Il barat da datas e da documents per ils process B2B tranter ils sistems dad IT da la clinica u pratica dals commembers eSANITA e la plattafurma B2B eHealth eSANITA succeda da princip via interfatschas HL7 standardisadas. La gronda part dals furniturs da software dispona gia d’interfatschas correspundentas ed enconuscha era questa tecnologia cumprovada. Uschia èsi pussaivel da colliar a moda fitg svelta, segira e cun custs supportabels ils pli differents sistems primars dals numerus commembers eSANITA cun la plattafurma B2B eHealth eSANITA. Davent da là vegnan registrads a basa da l’IHE, automaticamain e confurm a la lescha, ils documents relevants per il tractament dals pazients en il dossier electronic persunal (DEP) da las pazientas e dals pazients.
“Via duala” – avantatgs per il sectur da sanadad
Da quella profitescha l’entir sectur da sanadad, di Richard Patt, gestiunari da l’Uniun eSANITA e da la Cuminanza da referenza DEP Sidost:
“L’engaschi per l’Uniun eSANITA e per la Cuminanza da referenza DEP Sidost è er ina chaussa dal cor, perquai ch’ella è ina schanza unica d’accelerar la digitalisaziun en il sectur da sanadad da la Svizra Sidorientala a favur da nossas organisaziuns commembras e da la populaziun.”
Via duala eHealth eSANITA (B2B e DEP)
Servetschs eHealth dad eSANITA: soluziuns B2B e B2C cumprovadas
eSANITA ha concepì e realisà en moda interdisciplinara ils suandants Servetschs eHealth ensemen cun ils furniturs da prestaziuns dal sectur da sanadad:
- Barat da rapports eSANITA
- Recept eSANITA
- Management input-output eSANITA (per digitalisar infurmaziuns da sanadad)
- Assegnaziuns eSANITA
- Videocommunicaziun eSANITA
- DEP eSANITA
Ulteriurs Servetschs eHealth vegnan sviluppads da preschent ensemen cun ils commembers da l’uniun. eSANITA resguarda er ils svilups naziunals en connex cun il DEP e surtut en il sectur dals uschenumnads formats da barat per interfatschas standardisadas.
